చెట్టుని పట్టె మంచం చేసుకోగానే
అడవి మనకు అర్ధమైనట్టు కాదు
అక్కడ రాలిన ఆకుల బాధ
మనకి అర్ధమూ కాదు
శిశిరం అనుకోవచ్చు
ఇక్కడితో అడవి అంతమైంది అని
వసంతం రావచ్చు, రాకపోవచ్చు
అడవి మళ్లీ చిగురించకపోవచ్చు
కానీ...
అడవికి తెలుసు
ఎడారుల్లోకి ఎలా ప్రవహించాలో
ఏమీ లేనిచోట
వెదురు వనాలై ఎలా వికసించాలో
ఖనిజాల వేటలో
రాలిన ఆకుల నెత్తురు
కొత్త ఊపిరులు పీల్చుకోవచ్చు
కాంక్రీట్ జూల్లోకి కానలు ప్రవహించడం
కాస్త కష్టం కావచ్చు
ఆక్సిజన్ అందక అల్లాడే మనుషులకు
అది అత్యవసరం అయ్యే రోజు వస్తుంది
పన్నెండు గంటలు అంటున్నారు
అప్పుడే పది చేశారు
నీళ్లు విషం, గాలి విషం,
తినే తిండి విషం
థూ... ఏం బతుకురా ఇది..?
నీరసం నిండిన ఈ తరం
నిస్తేజమే మతమైన మనుషులు
ఏదో ఒకరోజు ప్రశ్నించడం నేర్చుకోవచ్చు
అడవి ప్రజాస్వామ్యమై
హస్తినని పడగొట్టే రోజొకటి రావచ్చు
