రాత్రి నాతో నువ్వు..
నీ బాహుమూలల్లో దాచుకున్న నా తలపుల వాసన
ఇంకా నా చుట్టూ నిలుచునే ఉంది
రాత్రి కురిసిన వాన
రాత్రి నలిగిన చీకటి దుప్పటి
నీ ఎదతో నా గుండెపై రాసిన లేఖ
నా కళ్లతో తాగిన నీ ఎంగిలి
నీ వీపు నా పెదాలకు ఇంకా అంటుకునే ఉంది
ఆ మెడవంపులో దాక్కున్న నా ముఖం
ఇంకా అక్కడే ఉంది
అన్నిటికీ మించి ఈ కల ఇంకా పచ్చిగానే ఉంది
బహుశా నీకూ అదే కల వచ్చిందనుకుంటా
దూరం భారమే ఎప్పుడూ
ఒక్కోసారి దూరమే మరింత దగ్గరేమో కూడా...