బీడెవిల్డ్‌

సినిమాల్లో క‌త్తుల‌తో పొడుచుకునే సీన్లంటే నాక‌స‌హ్యం. చిన్న‌ప్పుడైతే ఆ సీన్లు వ‌స్తుంటే చ‌ల్ల‌గా ప‌క్క‌కి జారుకునేవాడ్ని. ఆ టైమ్‌లో మా అక్కోళ్లు న‌న్నుఓ రేంజ్‌లో ఏడిపించేవాళ్లు. త‌ర్వాత భ‌యం పోయింది కానీ.. ఆ సీన్లంటే మాత్రం ఇప్ప‌టికీ అస‌హ్య‌మే. ఈ మూవీ చూసేట‌ప్పుడు కూడా కొన్నిచోట్ల కాస్త‌ చిరాకేసింది. కానీ ఎందుకో రెండు రోజుల్నించీ సినిమా క‌దిలిస్తూనే ఉంది. కార‌ణం ఇందులో స‌బ్జెక్ట్‌. 

చ‌దువు ఎలాంటి జ్ఞానాన్ని ఇవ్వ‌ద‌ని నేను న‌మ్ముతాను. కేవ‌లం ఉద్యోగం సంపాదించుకోడానికి మాత్ర‌మే ఉప‌యోగ‌ప‌డుతుంది అనుకుంటాను. చ‌దువుకున్న చాలామందిపై నాకున్న స్వంత అభిప్రాయాలు కావ‌చ్చు, అక‌డ‌మిక్ ఎడ్యుకేష‌న్ తీరుపై నాకున్న అస‌హ్యం కూడా కార‌ణం కావ‌చ్చు. సొంతంగా ఆలోచించే శ‌క్తి క‌లిగిన‌వాళ్లు చ‌దువుకున్నా, చ‌దువుకోక‌పోయినా సివిలైజ్డ్‌గానే ఉంటారు. ప్ర‌త్యేకించి.. చ‌దువుకున్న వారిలోనే ఎక్కువ‌గా గొర్రెల్లాంటి మ‌న‌స్త‌త్వం పెరుగుతుంద‌నేది కూడా నా అభిప్రాయం. అలాంటి వాళ్ల‌ని త‌యారుచేసుకోవ‌డ‌మే అక‌డ‌మిక్ సిస్ట‌మ్ ల‌క్ష్య‌మేమో అనిపిస్తుంది. అదే నిజ‌మేమో కూడా. ఇక‌ ఈ ఉన్న‌త చ‌దువులు చదివిన వాళ్లేదో ఉద్ధ‌రించేస్తార‌న్న పిచ్చి న‌మ్మ‌కం మ‌రికొంద‌రిది. ఇలాంటి అభిప్రాయంతోనే బీ డెవిల్డ్ తీసిన‌ట్టున్నారు. సినిమాలో చాలా సీన్లు మ‌రీ హింసాత్మ‌కంగా అనిపిస్తాయి. స్త్రీలు భ‌రించే హింస‌తో పోలిస్తే ఇది చాలా త‌క్కువేనేమో.. అన్న కోణంలో చూస్తే మాత్రం బిడెవిల్డ్ మ‌రీ అంత భ‌యంక‌రంగా అనిపించ‌దు. చాలామంది ఆడ‌వాళ్లు ఎంత‌ భ‌యంక‌ర‌మైన జీవితాన్ని చూస్తున్నారో అన్న‌ది మాత్ర‌మే అర్ధ‌మ‌వుతుంది.

ఈ సినిమా చూడ్డానికి కార‌ణం పాకాల రాజేష్‌. ఏపీ రెసిడెన్షియ‌ల్ స్కూల్‌, గ‌ణ‌ప‌వ‌రంలో నా ఫ్రెండ్‌. ఎయిత్‌ టు టెన్త్‌
క‌లిసి చ‌దువుకున్నాం. త‌ర్వాత ఎవ‌రి జీవితం వాళ్ల‌ది. లాస్టియ‌ర్ స‌డెన్‌గా ఎఫ్‌బీలో ఫ్రెండ్ రిక్వెస్ట్‌. ఎలా ప‌ట్టుకున్నాడో కానీ సాధించాడు. నిన్న చాటింగ్‌లో త‌ను కొన్ని సినిమాల లిస్ట్ పంపాడు. నాకున్న స్నేహితుల్లో నాకే ఎక్కువ సినిమా జ్ఞానం ఉంద‌న్న కొవ్వు ఏ మూలో ఉంటుంద‌నిపిస్తుంది. కానీ త‌ను పంపిన‌ లిస్ట్ చూశాక ఆ కొవ్వు కాస్తా క‌రిగిపోయింది. ఒన్ ఫ్లూ ఓవ‌ర్ కుకూస్ నెస్ట్ ద‌గ్గ‌ర నుంచి ఎన్ని సినిమాలో. అందులో కొరియ‌న్ సినిమాల్లో ఈ బీడెవిల్డ్ కూడా ఒక‌టి. క‌చ్చితంగా చూడ‌మ‌ని ఆర్డ‌రేశాడు. దాంతో చూడాల్సొచ్చింది. కానీ ఇంత దుఃఖాన్ని భ‌రించలేమేమో. ఇంత దుఃఖాన్ని అనుభ‌వించే మ‌నుషుల జీవితాల్ని మార్చ‌లేక‌పోయినా.. క‌నీసం కాస్త మాట‌సాయ‌మైనా అందించ‌గ‌ల‌మా..? 

ఈ సినిమాలో అంతులేని దుఃఖ‌మే కాదు.. అద్భుత‌మైన స్నేహం ఉంది. మే బీ రాజేష్ ఇందుకే న‌న్నీ సినిమా చూడ‌మ‌న్నాడేమో.! ల‌వ్ యూ రాజేష్‌. బ‌ట్ అయామ్ నాటే గుడ్ ఫ్రెండ్‌.

(సినిమాలో హే-వోకి బోక్‌-నామ్ రాసిన లెట‌ర్స్ చూస్తుంటే, టెన్త్ అయిపోయాక రాజేష్ నాకు రాసిన లెట‌ర్ గుర్తొచ్చింది. దానికి నేను రిప్లై రాయలేదు. 20 ఏళ్ల‌ త‌ర్వాత మ‌ళ్లీ ఎఫ్‌బీలో వాడే న‌న్ను ప‌ట్టుకున్నాడు.)

అర్జున్‌'రెడ్డి'

ఎన్ని ప్రేమ క‌థ‌లైనా చెప్పు.. 
ఏదో ఒక మూల ఎదో స్టోరీ మిగిలిపోయే ఉంటది.
ఏ ఇద్ద‌రి వేలిముద్ర‌లు ఒక‌లా ఉండ‌న‌ట్టే.. ఏ ఇద్ద‌రి ప్రేమ‌కథ‌లు ఒక‌లా ఉండ‌వు. సామాజిక‌, ఆర్ధిక‌, మాన‌సిక స్థితిగ‌తుల వ‌ల్లే అనుకుంటావో లేక మ‌రోలా అనుకున్నా. ల‌వ్ ఈజ్ ఎట‌ర్న‌ల్‌, ల‌వ్ ఫెయిల్యూర్స్ ఆర్ ఎట‌ర్న‌ల్‌. 

ప్రేమ క‌థ‌ల్లో ఎన్ని షేడ్స్ ఉన్నా.. అందులో ఉన్నంత‌వ‌ర‌కూ ప్ర‌పంచంలో తామిద్ద‌ర‌మే ఉన్న‌ట్టు అనిపిస్తుంది. ప్రేమించిన మ‌నిషి దూర‌మైతే ప్రపంచంలో త‌నొక్క‌రే మిగిలిపోయిన‌ట్టనిపిస్తుంది. త‌ల్లిదండ్రులు, స్నేహితులు వీళ్లంతా నీ చుట్టూ ఉన్నా క‌నిపించ‌రు. ఆ ఒంట‌రిత‌నంలో ఉన్న పెయిన్‌ అనుభ‌వించిన‌వాళ్ల‌కే తెలుస్తుంది. నీలో నువ్వు బ్లీడ్ అవుతున్న‌ట్టు.. న‌ర్వ్‌స్‌ని ఎవ‌రో మెలిపెట్టి లాగుతున్న‌ట్టు.. త‌ల నిండా బ్ల‌డ్ క్లాట్ అయిపోయిన‌ట్టు.. 

ఇదంతా అర్జున్‌రెడ్డిలో క‌నిపిస్తుంది. ప్రేమ‌లో ఫెయిల్ అయిన ప్ర‌తి ఒక్క‌రిలో క‌నిపిస్తుంది. అర్జున్‌రెడ్డి దానికి రియాక్ట్ అయ్యే విధాన‌మే తెలుగుసినిమాకి కొత్త‌. మ‌రీ కొత్త‌దేం కాదు సూర్య స‌న్నాప్ కృష్ణ‌న్‌లో కొంత‌మేర‌కు ఇలాంటి పాత్రే క‌నిపిస్తుంది. కానీ దానికి ఇంత సీన్ లేదు. అందులో ఉన్నసూర్యకి అర్జున్‌రెడ్డికి యాటిట్యూడ్ తేడా ఉంది. మిడిల్ క్లాస్ అండ్ రిచ్‌కు ఉన్న తేడా. కాస్త పాత రోజుల‌కెళ్తే దేవ‌దాసుతో అర్జున్‌రెడ్డిని బాగా పోల్చొచ్చు. కానీ ప్రొఫెష‌న్ అనేది యాడ్ అయింది అర్జున్‌రెడ్డికి. అందుకే దేవ‌దాసు అంత విషాదంలో కూరుకుపోయే ధైర్యం అర్జున్‌రెడ్డి చేయ‌లేదు. కాస్త.. తండ్రి, ఫ్యామిలీ అని ఆలోచించాడు. దేవదాసు పెళ్లికి చాలా విలువిచ్చాడు. అర్జున్‌రెడ్డి ఈ ప‌నికిమాలిన ప‌ర‌మ ప‌విత్ర‌మైన‌ పెళ్లిని ఒక్క త‌న్ను త‌న్నేశాడు. పెళ్లి స్థాయేంటో చెప్పాడు. (మ‌రీ అంత ధైర్యంగా కాక‌పోయినా...)

విజ‌య్ దేవ‌ర‌కొండ యాక్టింగ్‌, లుక్ రెండూ కొన్నాళ్ల‌పాటు గుర్తుండిపోతాయి నిలిచిపోతాయి. అయితే అర్జున్‌రెడ్డి మాత్ర‌మే ఈ సినిమా కాదు. ప్రీతి లాంటి స్ట్రాంగ్ క్యారెక్ట‌ర్‌, హీరో ఫ్రెండ్స్ కూడా అంతే స్థాయిలో ఈ సినిమాకి అస్సెట్ అయ్యారు. సినిమాలో హీరోహీరోయిన్‌కు సంబంధించిన సీన్స్ ప‌క్క‌న‌పెడితే.. కాలేజ్ నుంచి వెళ్లిపోయే స‌మ‌యంలో అర్జున్ ఫ్రెండ్ కీర్తి, మ‌రో ఫ్రెండ్‌కి కిస్ ఆఫ‌ర్ చేసే సీన్ సూప‌ర్బ్‌. ఆ అమ్మాయి మ‌రోసారి క‌నిపిస్తే బాగుండు అనిపించింది. హీరో క్లోజ్‌ఫ్రెండ్ పాత్ర చేసినాయ‌న‌ యాక్టింగ్ బాగుంది. సినిమా లెంథీ బ‌ట్ వ‌ర్తీ. సినిమా మొత్తం రెబెల్‌గా క‌నిపించినా.. క్లైమాక్స్‌లో మ‌రీ ధైర్యం చేయ‌లేక‌పోయారేమో అనిపించింది. క్లైమాక్స్ ఒకే బ‌ట్ మిగిలిన సిన్మా స్థాయికి లేదు. కెమెరా వ‌ర్క్ మ‌రీ అంత గొప్ప‌గా లేదు. ఎడిటింగ్‌లో కొన్నిచోట్ల జంప్‌క‌ట్స్ బాగా చేశారు. బీజీఎంలు అద్భుతంగా ఉన్నాయి.. కానీ ఆ పాట‌లు అవ‌స‌ర‌మా అనిపించింది. 

ఇంకో చిన్న డౌట్ః చివ‌ర్లో హీరోయిన్ అడ్ర‌స్ తెలుసుకున్న‌వాడు.. త‌ను భ‌ర్త‌తో ఉందో, లేక ఒంట‌రిగా ఉందో తెలుసుకోలేక‌పోయాడా అన్న డౌట్ కొడ్తుంది. 

ఇక తోక సంగ‌తికొస్తే... అర్జున్‌రెడ్డి చివ‌ర్లో తోక అంత అవ‌స‌ర‌మా అనిపించింది. బ‌హుశా తెలుగు సినిమా ప‌రిశ్ర‌మ‌లో త‌మ ఉనికిని చాటుకోవాల‌న్న త‌ప‌న ఉందేమో డైరెక్ట‌ర్‌లో అనిపించింది. సినిమాలో అయితే తోక అవ‌స‌రం పెద్ద‌గా క‌న‌బ‌డ‌లేదు.

హీరో పాత్ర ఎంత ప‌విత్రంగా ఉంది, సమాజానికి ఎలాంటి మెసేజ్ ఇచ్చారు అన్న విష‌యాల జోలికి వెళ్ల‌ను. ఎందుకంటే ఇది ప‌క్కా క‌మ‌ర్షియ‌ల్ తెలుగు సినిమా మాత్ర‌మే. ప్రేమ విఫ‌ల‌మైన మ‌నిషి పెయిన్‌ని చూపించిన విధానం బాగా క‌నెక్టవుతుంది. హీరోయిన్ ప్రీతి పాత్ర బాగుంది. అర్జున్‌రెడ్డి పాత్ర‌ని తీర్చిదిద్ద‌డంపై మ‌రింత శ్ర‌ద్ధ పెట్టి ఉంటే బాగుండేది.

(మేకింగ్ విష‌యంలో బెంచ్‌మార్క్ అన్న లైన్ ఎడిట్ చేశాను. ఫ్లైట్ సినిమా చూశాక‌. మందులో ఆప‌రేష‌న్ చేయ‌డం, దాని త‌ర్వాత కోర్టు వ్య‌వ‌హారం లాంటివి యాజిటీజ్‌గా దించేశారేమో అనిపించింది. మిగ‌తా సీన్లు మ‌రేదైనా సినిమాలో క‌నిపించ‌క‌పోతే బాగుండు )

ఓల్డ్ బాయ్‌

నా జీవితం ఇలా సంక‌నాకి పోవ‌డానికి ఒక‌డు కార‌ణం. వాడు దొర‌కాలి. నాలో నేను కార్చుకున్న ర‌క్తానంతా.. వాడి నుంచి పీల్చుకుంటా. నా గుండెకి అయిన గాయాల‌కి వాడి చ‌ర్మంతో క‌ట్టు క‌ట్టేస్తా. క‌చ్చితంగా దొరుకుతాడు వాడు. కానీ వాడెవ‌డో తెలుసా..? 

నేనే..

నా సినిమాలో నేనే హీరో.. నాకు నేనే విల‌న్‌. 
ఎలా చంపాలి వీడ్ని..? ఎలా నా బాధ‌ని తీర్చుకోవాలి..?

ఈ సినిమా చూశాన‌ని చెప్ప‌గానే.. విహారి ఏమ‌న్నాడంటే.. ఎందుకు చూశావా సినిమాని..? 
వానెమ్మ.. ఏం కాన్సెప్ట్ అది. ఛీ.

నిజ‌మే కాస్త డైజ‌స్ట్ చేసుకోలేని కాన్సెప్టే. కానీ అది ఎంచుకోడానికి వాడెంత ధైర్యం చేసి ఉండాలి. ఒక సినిమాలో హీరో, విల‌న్ ఒక‌డ్నే చూపించడానికి ఎన్ని గుండెలుండాలి..? ద‌ట్స్ వై ఐ ల‌వ్ దిస్ మూవీ. 

గ్రీకు పురాణాల్లోని ఈడిప‌స్ పాత్ర‌ ఇన్‌స్పిరేష‌న్‌తోనే ఈ మూవీ తీశానంటాడు డైరెక్ట‌ర్ చాన్‌-వూ. హీరో పేరు ఈడిప‌స్‌ను గుర్తు తెచ్చేలా డే సు అని పెట్టాడ‌ట‌. అయితే ప్ర‌ధాన పాత్ర‌లు రెండూ ఈడిప‌స్‌ ప్ర‌తిరూపాల్లానే ఉంటాయి. 

ఈ సినిమా చాన్నాళ్ల నుంచి చూడాల‌ని, ధైర్యం చాల‌క చూడలేదు. సినిమా గురించి యూట్యూబ్‌లో చూస్తే ఎప్పుడూ ఒక ఫైట్ సీన్ క‌నిపించేంది. వార్నీ ఇదేదో చైనీస్ టైప్.. ఫైటింగ్ బాప‌త‌ని వ‌దిలేశా. కానీ ఎందుకో ధైర్యం చేసి చూశా. వాటే స్క్రీన్‌ప్లే..వాటే స్క్రీన్ ప్లే. 

సినిమా చూడ‌డానికి ముందు నేను చూసిన కారిడార్ ఫైట్ సింగిల్ టేక్‌లో తీశారంట‌. మూడు రోజులు 17 టేక్‌లు తీస్తే.. ఫైన‌ల్‌గా ఒక టేక్‌ను తీసుకున్నారు. ఒక్క ముక్క కూడా ఎడిట్ చేయ‌లేదు. కేవలం హీరో వీపుపై దిగే క‌త్తి కోసం మాత్రమే గ్రాఫిక్ వ‌ర్క్ చేశారు. 

ఈడిప‌స్ క‌థ తెలిసుంటే సినిమాలో కంటెంట్ కూడా ఏమాత్రం ఇబ్బంది పెట్ట‌దు. మ‌స్ట్ వాచ‌బుల్ మూవీ(మై ఫీలింగ్‌).