పేరసైట్కి ఆస్కార్ల పంట పండగానే... ఒక పత్రికలో 'విమర్శకుల అంచనాలు తలక్రిందులు చేస్తూ' అంటూ రాశారు. నిజానికి ప్రపంచ సినిమాని ఇష్టపడేవాళ్లలో పేరసైట్ గురించి జరిగినంత చర్చ మరేదాని గురించీ జరగలేదు. బాంగ్ జూన్ హో ఇవాళ ప్రపంచానికి తెలిసిన డైరెక్టర్ కాదు. పదహారు పదిహేడేళ్ల క్రితమే ప్రపంచం దృష్టిని ఆకట్టుకున్న డైరెక్టర్. నేను పేరసైట్ ఇంకా చూడలేదు కానీ ఇదే బాంగ్ జూన్ హో తీసిన మెమరీస్ ఆఫ్ మర్డర్ చూశా. ఎనభైల్లో దక్షిణ కొరియాని వణికించిన సీరియల్ హత్యల నేపథ్యంగా వచ్చిన సినిమా(ఆ దేశంలో తొలి సీరియల్ కిల్లర్ కేసుగా చెప్పుకుంటారు). సీరియల్ హత్యలపై నేను చూసిన వాటిలో బాగా నచ్చిన సినిమా.
నేరస్తుడంటే... ప్రతి ఒక్కరి దృష్టిలో ఒక నిర్వచనం ఉంటుంది. కొందరికి గడ్డంబాగా పెంచుకున్నవాళ్లంటే అనుమానం. ఎవరితో ఎక్కువగా మాట్లాడని వాళ్లంటే మరికొందరికి అనుమానం. కొన్ని కులాల వాళ్లు మాత్రమే నేరస్తులుగా ఉంటారని కొందరి నమ్మకం. నల్లగా ఉండేవాళ్లే నేరస్తులని మరికొందరి నమ్మకం. టీవీలో హత్య వార్తా రాగానే అందరం డిటెక్టివుల్లా అయిపోతాం. 'చనిపోయినపిల్ల అమ్మానాన్న సరిగా ఏడవడమే లేదు. వాళ్లే హంతకులు! వాళ్ల ఇంట్లో పనోళ్లే ఈ పని చేసుంటారు. వాళ్లే అలాంటి పనులు చేస్తుంటారు!' ఇలా మనకి నచ్చనివాళ్లని, మనకి చిన్నచూపు ఉండే మనుషుల్ని నేరస్తుల్ని చేస్తూ మానసికంగా తృప్తి పడుతుంటాం. మనకంటే పోలీసులేం తురుంఖాన్లు కాదు. టెక్నాలజీ సరిగా అభివృద్ధికాని, నేరపరిశోధనలో శాస్త్రీయత మెరుగవని దేశాల్లో మామూలు జనానికీ, పోలీసులకీ పెద్ద తేడా ఉండదు. పదహారేళ్ల కింద ఈ విషయాల్ని ప్రపంచసినిమా స్క్రీన్ మీద చర్చకు పెట్టింది మెమరీస్ ఆఫ్ మర్డర్.
నేరస్తుడ్ని కంటి చూపుతోనే పసిగట్టగలనని డప్పాలు కొట్టే డిటెక్టివ్, ఏ నిందితుడికైనా థర్డ్ డిగ్రీ ట్రీట్మెంట్ మాత్రమే ఇచ్చి నేరాన్ని ఒప్పుకోవడమే శరణ్యంగా చేసే మరో పోలీస్, సియోల్ నుంచి ప్రత్యేకంగా వచ్చిన ఇంకో డిటెక్టివ్(కాస్త ఎఫ్బిఐ టైప్). ఈ ముగ్గురి పరిశోధన, పరిశోధనలో వాళ్ల వాళ్ల శైలి, ఒకరిపై మరొకరి ప్రభావం, వాళ్ల అహం, వాళ్లలో వచ్చే మార్పు... ఇదే సినిమా. హంతకుడ్ని పట్టుకునే క్రమంలో వాళ్లేంటో వాళ్లు తెలుసుకుంటారు. వాళ్లకీ హంతకుడికీ మధ్య పెద్దగా తేడా లేదని తెలుసుకుంటారు.
సీరియల్ హత్యల సినిమాల చరిత్రలో ఈ మూవీ ముగింపు ఊహించనిది. ఊహకి అందనిది.
ముగింపు సీన్లో... ఉద్యోగం వదిలేసి తన మానాన తను బతుకుతున్న డిటెక్టివ్, సీరియల్ హత్యల్లో తొలి హత్య జరిగిన చోటుండే దారిన వెళ్తూ ఆగుతాడు. గతంలో హత్య జరిగిన కాలువ దగ్గరకి వెళ్లి తొంగి చూస్తుంటాడు.
అటే వెళ్తున్న ఓ పిల్ల 'ఏం చూస్తున్నావు' అని అడుగుతుంది.
మామూలుగానే చూస్తున్నా... అంటాడు.
కొన్నిరోజులక్రితం కూడా ఇంకొక అతను ఇలాగే చూశాడు అంటుందా పిల్ల. తనని ఏం చూస్తున్నావు అని అడిగితే... 'చాలా ఏళ్లక్రితం ఇక్కడో పని చేశా, అందుకే ఈ చోటుని చూడటానికి వచ్చాను' అన్నాడని చెప్తుంది.
ఆ వ్యక్తి ఎలా ఉంటాడో చెప్పమంటాడు మాజీ డిటెక్టివ్.
మామాలుగానే ఉన్నాడు అంటుంది.
మామూలుగానే అంటే... అని రెట్టిస్తాడు.
దానికా పిల్ల 'అందరిలాగే ఉన్నాడు' అంటుంది.
అక్కడితో సినిమా ముగుస్తుంది.
https://www.youtube.com/watch?v=Ycd3lISxogg